Управувачка структура

Д-р Андриана Матлиоска е државен секретар во Министерството за финансии на Република Северна Македонија. Повеќе од една деценија нејзиното професионално искуство се протега во областа на јавните финансии, банкарството, усогласеност со регулатива и корпоративно управување.

Кариерата ја започнува во Министерството за финансии, на почетокот на 2015 година, каде што извршува повеќе одговорни позиции поврзани со координирање на процеси со областа на финансискиот сектор, следење на финансиското работење на јавните претпријатија, трговските друштва и агенции, буџетските процеси и креирањето политики. Во периодот 2021 – 2024 година ја извршува функцијата одговорно лице за контрола на усогласеност со прописи, а едновремено е одговорна за вршење на функциите офицер за заштита на лични податоци и одговорно лице за FATCA во една од македонските банки, каде што беше задолжена за регулаторна усогласеност, управување со ризик од неусогласеност и имплементација на меѓународни финансиски стандарди. Во 2024 година се враќа во Министерството за финансии како посебен советник на министерот, а наскоро потоа е именувана за државен секретар.

Христина Келемен дипломира на Економскиот факултет при Универзитетот „Св. Кирил и Методиј“ во Скопје, каде ги завршува и постдипломските студии на Економскиот институт. Професионалната кариера ја започнува во 2002 година во приватниот сектор, а во 2008 година ја продолжува во Канцеларијата на Претседателот на Владата, каде работи на економски политики како Државен советник за економски прашања. Како извршен член на Одборот на директори на АД Тутунски комбинат Прилеп активно учествува во корпоративното управување, стратешкото планирање и реализацијата на развојни проекти. Истовремено, ја извршува функцијата в.д. Претседател на Советот за унапредување и надзор над ревизијата. Во моментов е Советник за финансиски прашања во Канцеларијата на Претседателот на Владата.                                                            

Од 14.10.2025 година е член на Надзорниот одбор на Развојна банка на Северна Македонија АД Скопје.

Тања Михајловска Димитриевска е родена во 1981 година во Скопје. По дипломирањето на Eкономскиот факултет при Универзитетот Св. Кирил и Методиј во Скопје, на Катедрата за финансиски менаџмент, својата професионална кариера ја започнува во Ernst & Young – Скопје во одделот за екстерна ревизија на банки и осигурителни компании. Од 2005 година почнува да работи во ПроКредит Банка каде што станува  Директор на внатрешна ревизија. Во последните десет години (од 2015 до денес) работи како експерт и Глобален директор за внатрешна ревизија во инвестициски банки во Лондон, Обединетото Кралство каде води глобални тимови и спроведува ревизии во области како стратегиски промени и трансформации, коорпоративно кредитирање, приватно банкарство и коорпоративна култура. Таа е Овластен внатрешен ревизор од Институтот за Ревизори во Обединетото Кралство (IIA UK, 2023) и е сертифицирана за спремност за управни и надзорни одбори (Board Readiness Programme, 2025). Воедно активно делува и како лидер/амбасадор во Women on Boards Adria, член на European Women on Board и поранешен основач и член на управниот одбор на Институтот за Внатрешни Ревизори во Северна Македонијa.

Ариф Муса е роден во 1961 година во с. Липковица, Тетово. Универзитетското образование го стекнува на Економскиот факултет во Приштина во 1988 година. По завршување на високото образование, работи како сметководител и финансиер во приватни претпријатија, професија која ја извршува до неговото пензионирање. Во 1996 година е избран од страна на Советот на Општина Тетово за член на Одборот за контрола на материјално-финансиското работење на Јавното претпријатие ТЕТОВО,  функција која ја извршува до март 1998 година. Од ноември истата година до 2022 година работи како член на Одборот за контрола на материјално-финансиското работење на Медиумската Информативна Агенција – МИА. На предвремените локални избори во 1998 година и редовните локални избори во 2000 година, е избран за советник на Општина Тетово каде е председател на Комисијата за финансии и буџет до 2005 година. Од страна на Собранието на Република Северна Македонија во јануари 2007 година, е избран за член на Комисијата за спречување на корупцијата со мандат од 4 години, функција која ја извршува до април 2011 година.

Од 15.6.2026 година ја извршува функцијата член на Надзорен одбор на Развојна Банка на Северна Македонија АД Скопје.